♥️ కథ-13 ♥️
అనుభూతి - నాలో ఉన్న దయాగుణానికి నేను కృతజ్ఞుడను
పూజారి కుమారుడు
ఒక రాజ్యంలో, మహా జ్ఞానిగా ప్రసిద్ధిగాంచిన ఒక పూజారి ఉండేవాడు. ఆయన వివేకం చాలా ప్రాంతాలలో ప్రశంసించబడేది, చర్చించబడేది.
ఒకరోజు, మహారాజు పూజారిని తన ఆస్థానానికి ఆహ్వానించి, ఆస్థానానికి చేరుకున్నాక, ఆయనతో చాలా విషయాలపై సుదీర్ఘంగా, లోతుగా చర్చించాడు.
చర్చ ముగిసిన తరువాత పూజారి బయలుదేరుతుండగా, రాజు ఆయనతో, "గురుదేవా! మీరు అనుమతిస్తే, నేను మిమ్మల్ని ఒక విషయం అడగాలనుకుంటున్నాను." అన్నాడు.
పూజారి, "అడగండి, ప్రభూ" అన్నాడు.
" మీరు చాలా తెలివైనవారు, కానీ మీ కుమారుడు ఎందుకు అంత తెలివితక్కువగా ఉన్నాడు?" అని అడిగాడు.
ఊహించని ఈ ప్రశ్నకు పూజారి కంగుతిన్నాడు. " మహాప్రభూ, మీరు అలా ఎందుకు అంటున్నారు?" అని అడిగాడు.
‘‘ బంగారం, వెండిలో ఏది విలువైనదో కూడా మీ కుమారునికి తెలియదు’’ అని రాజు ఆక్షేపించాడు.
అది విని అక్కడున్న సభికులందరూ నవ్వడం మొదలుపెట్టారు.
పూజారి అందరి వైపు అయోమయంగా చూసి, అవమానంగా భావించి, ఏమీ మాట్లాడకుండా మౌనంగా ఇంటికి చేరుకున్నాడు.
రాజు గారి మాటలు, సభికుల నవ్వులు మనస్సులో ఇంకా ప్రతిధ్వనిస్తూనే ఉన్నాయి. అతను చాలా విచారంగా ఉన్నాడు.
కొడుకు తండ్రి దిగులుగా ఉండడం చూసి, “ఎందుకు ఇంత దిగులుగా ఉన్నావు?” అని అడిగాడు.
పూజారి, "బాబు, నేను నిన్ను ఒక ప్రశ్న అడగాలనుకుంటున్నాను."
" అడగండి నాన్నగారు", అన్నాడు కొడుకు.
" బంగారం, వెండి రెంటిలో విలువైనది ఏది?"అని పూజారి అడిగాడు.
" బంగారమే విలువైనది," అని కొడుకు సమాధానం చెప్పాడు.
కొడుకు సమాధానం పూజారికి కాస్త ఊరటనిచ్చింది.
అతను “నువ్వు సరైన సమాధానమే చెప్పావు, అలాంటప్పుడు రాజు నిన్ను మూర్ఖుడు అని ఎందుకు అన్నాడు? బంగారం, వెండి విలువల మధ్య నీకు తేడా తెలియదని ఎందుకన్నాడు?” అని అడిగాడు.
తండ్రి ద్వారా జరిగిన సంఘటన అంతా విన్న కొడుకు తండ్రిని కలవరపెడుతున్న విషయం అర్థం చేసుకున్నాడు.
అతను వివరించడం ప్రారంభించి, "నాన్న! రోజూ ఉదయాన్నే నేను పాఠశాలకు రాజుగారు ప్రజలతో కొలువు తీరే ఆస్థాన ప్రాంతం ద్వారా నడుచుకుంటూ వెళ్తాను.
అక్కడ పండితులందరూ కూర్చుని వివిధ అంశాలపై చర్చిస్తూంటారు.
నేను అక్కడి నుండి వెళ్ళడం చూసి, రాజు నన్ను తరచుగా పిలిచి, ఒక చేతిలో బంగారు నాణెం, మరో చేతిలో వెండి నాణెం ఉంచుకుని, నాకు విలువైనదిగా దేనిని భావిస్తే, దాన్ని ఎంచుకోమని అడుగుతాడు.
నేను రోజూ వెండి నాణెం తీసుకుంటాను. అది చూసి ప్రతిరోజూ, వారు నన్ను ఎగతాళి చేస్తారు, అక్కడ నుండి మౌనంగా వెళ్లిపోతుంటే, చూసి నవ్వుతారు." అని చెప్పాడు.
అది విన్న పూజారి చాలా కంగారు పడ్డాడు. “వెండి కంటే బంగారం విలువైనదని నీకు తెలిసినప్పుడు, బంగారు నాణెం తీసుకోని రా.
వాళ్ల దృష్టిలో నువ్వు మూర్ఖుడివని ఎందుకు నిరూపించుకుంటున్నావు? నీ వల్ల నేనూ అవమానానికి గురయ్యాను” అన్నాడు.
కొడుకు నవ్వుతూ, "నాతో రండి నాన్నగారు, దానికి కారణం చెబుతాను" అన్నాడు.
తన తండ్రిని నగర శివార్లకు తీసుకెళ్లాడు, అక్కడ కొంతమంది నిరాశ్రయులు, పేదలు నివసిస్తున్నారు. ఆ కుర్రవాడిని చూడగానే వారి ముఖాలు వెలిగిపోయాయి, చాలా మంది అతన్ని ప్రేమతో పలకరించారు.
తన కుమారుడికి అంత మంది ప్రజలు ఆశీస్సులు ఇవ్వడం చూసి పూజారి ఆశ్చర్యపోయాడు.
కొడుకు "తండ్రీ, వీరిలో చాలా మందికి చేయడానికి పని దొరకట్లేదు, తినడానికి సరైన తిండి లేదు. నేను వెండి నాణెం తీసుకున్న ప్రతిసారీ, ఇక్కడకు వచ్చి వీరిలో ఒకరికి ఇస్తాను.
వీరి దృష్టిలో వెండి నాణానికి చాలా విలువ ఉంది, ఎందుకంటే ఆ ఒక్క వెండి నాణెంతో చాలా మందికి ఆహారం దొరుకుతోంది. ఆహారం తినడం వలన ఆకలి తీరి, ఆరోగ్యంగా పనికి కూడా వెళ్తున్నారు, పని చేయగలుగుతున్నారు.
“ చేతిలో బంగారు, వెండి నాణేలతో నన్ను ఆపి ఆ ప్రశ్న అడగడం రాజుకు, ఆయన సభికులకు ఒక ఆటగా, హాస్యంగా మారింది. తరచుగా వారు నాతో ఈ ఆట ఆడతారు, నేను ఎల్లప్పుడూ వెండి నాణెం ఎంచుకుంటాను.
ఎందుకంటే, నేను బంగారు నాణెం తీసుకున్న రోజు, ఈ ఆట ముగుస్తుంది, అప్పుడు వీరికి ఇవ్వడానికి నా దగ్గర ఏమీ ఉండదు. అందుకే నేను ఎప్పుడూ బంగారు నాణెం తీసుకోను” అని చెప్పాడు.
పూజారి తన కుమారుని చూసి గర్వపడ్డాడు, అతని దృక్కోణాన్ని అర్థం చేసుకున్నాడు, అదే సమయంలో రాజుకు నిజం చెప్పడం కూడా ముఖ్యమని భావించాడు.
అందుకని తన కుమారుని సభకు తీసుకువెళ్ళాడు, అక్కడ బంగారం ఎక్కువ విలువైనదని తెలిసినప్పటికీ వెండి నాణెంతన కుమారుడు ఎందుకు తీసుకున్నాడో రాజుకు మొత్తం వివరించాడు.
ఆ కుర్రవాడి వివేకం, దయాగుణం, కరుణ చూసి రాజు చాలా ముగ్ధుడయ్యాడు.
"ఇతడు నిజమైన పండితుడు" అని చెప్పి, ఒక పెట్టె నిండా బంగారు నాణేలు ఆ కుర్రవానికి ఇవ్వమని ఆదేశించాడు.
నిరాశ్రయులైన ఆ ప్రజలను తగిన వసతులను కల్పించమని తన మంత్రులకు ఆజ్ఞాపించాడు.
వాస్తవానికి, ఎటువంటి డాంభికాన్ని చాటుకోకుండా కేవలం మన పనిని మనం కొనసాగించినట్లయితే, మనకు, మన చుట్టూ ఉన్న వ్యక్తులకు మనం మరింత మేలు చేయగలం.
నువ్వు ఎంత సమర్థుడవో ప్రపంచం అంతా గుర్తించే సమయం వచ్చినప్పుడు, నువ్వు బంగారంలా మెరిసిపోతావు, అందరూ నిన్ను గౌరవిస్తారు.
♾️
జీవితానికి సక్రమమైన ఆలోచన, సరియైన అవగాహన, నిజాయితీ గల దృక్పథాన్ని పెంపొందించడంలో సహాయపడే వివేకాన్ని వృద్ధిచేసుకోవడానికి ధ్యానం మనకు సహాయపడుతుంది.
దాజీ
♾️
హార్ట్ ఫుల్ నెస్ ధ్యానం 💌
టేలిగ్రం గ్రూప్ జాయిన్ అవ్వడానికి ఈ క్రింది లింక్ ను షేర్ చేయగలరు.
https://t.me/+EP0P5o4HCztjYmRl
#heartfulness #hertfulnessstories #heartstories #dailyonestory #shortstories #daily1shortstory
#bedtimestories #bedstoriesforkids #storiesforbedtime #kidsstoriesatbedtime #bedtimekids
#dailyshortstories #storiesforkids #kidsstories #stories for children #childrenstories #good stories #shortstory #simplestory #simplestories #simple shortstories #goodstories #goodshortstories
#dailystories #telugushortstories #telugustories #telugustoriesforkids #supersimplestories
#supershortstories #newshort stories #newstoriesforkids #vintagestoriesforkids #oldshortstories
#oldstoreisforkids #oldkidsstories #vintagetelugustories #vintagetelugustoriesforkids #daaji #daajimaharaj #heartfulnesstelugustories #heartfulnessshortstories #hearfulnesstelugu
No comments:
Post a Comment